Wie kan dan nou ‘n vy weerstaan?

Wie kan dan nou dié tyd van die jaar ‘n heerlike vy weerstaan? Die Boland se parsseisoen is byna

verby en wingerde begin reeds hul herfskombers toon. Maar steeds is daar vele somer-heerlikehede, soos druiwe, perskes en dies meer, op winkelrakke.

Wat my oog veral vang, is die heerlikheid van vye met hul diep persgewaad wat die rakke versier.

Waar ek hulle sien, koop ek maar, want die seisoen is kort. Ek hou hulle yskoud in my yskas en as ek oopmaak om iets uit te haal, kan ek dit nie weerstaan om net so na ene te gryp en dadelik daaraan te smul nie.

‘n Doeksag velletjie en ‘n stroopsoet pienk binneste met die kleinste pêrelkorreltjies wat heerlik onder jou tande ontplof – die eenvoud self van nóg ‘n heerlike vrug waarmee ons geseënd is.

Sedert die Bybel se tyd word aan hierdie lekkerte gesmul, so vroeg selfs as in die tuin van Eden – dalk die oorsprong van die Adamsvy?

Hierdie vye groei nou op talle plase in die Boland en hieroor is ek tog te bly, want hulle is nou maklik verkrygbaar – ook sonder om weer ‘n plaas se geld te betaal.

Maak só met vye

Geen kaasbord met sterk sout-kase soos bloukaas en dies meer is volledig sonder ‘n paar vye tussenin nie.

So ‘n vy, middeldeur gesny met ‘n stuk bloukaas bo-op en onder die oondrooster geplaas vir net ‘n paar minute totdat die kaas smelt en borrel, is ‘n baie vinnige, maklike maar al te smaaklike peuselhappie.

Ook as ‘n slaai – in kwarte gesny op vars roketblare met repies Parmaham bo-oor geskeur, bolletjies bokmelkkaas of labneh (yogurt-balletjies), en ‘n titseltjie goeie balsamiese vinaigrette of, nog beter, granaatstroop, is perfek.

Maar as ‘n nagereg gebak in die oond ontpop die ou vytjie in ‘n heeltemal

ander gedierte. Die Franse maak mos ‘n tarte tatin – oftewel onderstebo appeltert – maar ek besluit toe vye is net die regte ding hiervoor.

Vir vye- tarte tatin benodig jy:

• 12 ryp Adamsvye of soortgelyk

• 70 gram botter

• 3 e. suiker

• ¼ t. pimento

• die gerasperde skil van een suurlemoen

• 1 t. vanieljegeursel

• een vel skilferkorsdeeg

• 100 gram gevlokte amandels, gerooster tot effe bruin

Vir die bloukaasroom:

• 250 ml room

• 75 gram bloukaas

Maak dan só

Jy sal ‘n pan of koekpan moet gebruik wat in die oond gebruik kan word.

Vir hierdie resep werk my vlekvrye pan met ‘n deursnee van 25 cm perfek.

Verhit dit op die stoof tot goed warm en plaas die botter daarin. Voeg dan die suiker by en smelt alles vinnig en borrelend saam.

As dit ná slegs ‘n paar minute ‘n ligte karamel begin vorm, voeg die vanieljegeursel, suurlemoenskil en speserye by.

Maak seker dat die karamel nie te donker raak nie, anders begin dit bitter smaak.

Roer goed deur en plaas die vye platkant ondertoe bo-op jou karamel sodat die hele pan knus volgepak is met die vye.

Haal van die hitte af en plaas die vel skilferkors daaroor sodat die rand van die kors oor die pan se bek hang.

Sny die oortollige deeg af sodat dit mooi styf in die pan bo-op die vye pas en druk die rande van die kors langs die vye in om dit mooi toe te vou.

Plaas jou pan in ‘n verhitte oond van 160 °C vir 25 minute totdat die kors diep goudbruin is.

Haal uit en laat staan vir so 10 minute.

Gly ‘n mes om die rand van die pan om te verseker dat niks dalk vasklou nie.

Plaas ‘n opdienbord wat groter as jou pan is bo-op die pan en draai die pan op die bord om sodat die onderstebo-vyetert netjies daarop uitval.

Sprinkel die amandels bo-oor.

Vir die bloukaasroom, klits die room totdat dit net begin dik raak.

Krummel die bloukaas daarby en klits dan verder tot goed styf, maar nog nie botter nie.

Sit die tert effe warm voor met ‘n skeppie bloukaasroom op elke skyf.

En nou kan jy hemel in jou mond proe.

Sit gerus met ‘n yskoue Bolandse Sauvignon Blanc voor.