Die Wes-Kaap se termometers gaan hierdie naweek styg, en die aksie op die rugbyveld gaan net so warm wees wanneer die top twee spanne op die Vroue-Premierafdeling-punteleer, die Sanlam Boland Dames en die Bulls Daisies, mekaar pak in Wellington op Saterdag, 8 Februarie.
Die Bulls Daisies het hul eerste twee wedstryde oorheers en reeds 159 punte en 26 drieë aangeteken, terwyl hulle slegs een drie afgestaan het – ‘n duidelike bewys van hul oorheersing.
Die Boland Dames, wat 18 drieë en 116 punte op die telbord gesit het, is egter die enigste ander span wat al dubbelsyfers in drieë kon behaal. Hulle het ook net 25 punte afgestaan, wat wys dat hulle ‘n taai teenstander gaan wees. Die Dames sal beslis mik vir ‘n derde agtereenvolgende oorwinning hierdie naweek.
Afskoptyd: 12:30.
Boland Kavaliers vs. DHL Stormers in vriendskaplike kragmeting
Vrydagmiddag (7 Februarie) neem die Boland Kavaliers die DHL Stormers aan in ‘n opwarmingswedstryd vir die komende SA Beker-kampioenskap. Die aksie skop af om 17:00 by Boland Stadion.
Rugbyliefhebbers kan dus uitsien na ‘n opwindende naweek van topgehalte aksie in die Boland!
