Dr. Marichen van der Westhuizen en vyf Hugenote Kollege-studente sal vanaf 31 Oktober tot 14 November die Kollege verteenwoordig by die Evangelische Fachhochschüle Rheinland-Westfalen-Lippe in Bochum, Duitsland.
Hulle gaan deelneem aan ’n internasionale week: ‘Enhancement of Life – Challenge and Opportunity for Social Work Professions’ en spesifiek fokus op leierskap in die benutting van musiek en dans om interkulturele kommunikasie en verdraagsaamheid te bevorder.
Verteenwoordigers van 14 instansies in 11 verskillende lande gaan deelneem aan hierdie week.
Dr. van der Westhuizen (navorser en programaanbieder) het vyf studente gekeur vir deelname aan die projek op grond van hulle musiek-, dans- en leierskapsvaardighede. Dié studente is Ettiene Wessels, Sharon Stoffels, Kim-Lee Botha, Yanico Conradie en William Konstabel en hulle kry die geleentheid om studente van regoor die wêreld binne ’n interkulturele konteks te leer verstaan, ten spyte van kulturele en taalverskille.
Hulle gaan dit doen deur van nie-verbale metodes (musiek en dans) gebruik te maak om interpersoonlike kommunikasie en insigontwikkeling te bewerkstellig.
