’n Skaars bottel KWV 1930 Muskadel het Woensdagaand (7 Mei) ’n verstommende R17 000 opgelewer tydens die tweede jaarlikse KWV-veiling wat in die ikoniese Katedraalkelder aangebied is. Dié uitsonderlike lot – gebottel voor die Tweede Wêreldoorlog en sedertdien in KWV se private kelder bewaar – was een van 116 uitstaande wyn- en brandewyn-lotte en het as gepaste hoogtepunt vir ’n aand van lewendige bieëery gedien.
Die veiling het afgesluit met ’n voorlopige totaal van R427 300 (onderhewig aan ouditering), ’n prestasie wat KWV se reputasie as een van Suid-Afrika se mees gerespekteerde vervaardigers van versamelbare wyn en spiritualieë bevestig. Soos met die eerste veiling vroeër vanjaar, sal die wins van die 2025-veiling aan Nation Builder geskenk word om volhoubare gemeenskapsontwikkeling regoor Suid-Afrika te ondersteun.
KWV se hoof uitvoerende beampte, John Loomes, het die volgende gesê oor die sukses van die aand: “Dit is ’n voorreg om nog ’n mylpaal in KWV se 107-jarige reis te beleef – en om ’n nalatenskap te vier van wyne en brandewyne wat mense kies om deel te maak van hul kosbaarste herinneringe. Dit is des te meer betekenisvol dat hierdie visie vanaand in só ’n merkwaardige uitslag gekulmineer het – een wat ver buite ons keldermure sal eggo en ’n blywende impak in gemeenskappe sal hê.”
’n Skaars bottel KWV 1930 Muskadel het Woensdagaand (7 Mei) ’n verstommende R17 000 opgelewer tydens die tweede jaarlikse KWV-veiling.
Prestige, stories en perfekte oorsprong
Die veiling is professioneel aangebied deur Strauss & Co en het wynbottels van onberispelike herkoms, unieke stories en gesogte toekennings vertoon. Dié insluitings het onder meer wyne uit KWV se premium reekse soos The Mentors, Roodeberg, en Cathedral Cellar behels – insluitend verouderde vertikale versamelings en spesiale Pinotage-huldelotte ter ere van Suid-Afrika se ikoniese kultivar.
Die vertikale versameling van The Mentors Chardonnay uit die jare 2011, 2013 en 2015 het besonder hoë belangstelling gelok – en die seldsaamheid van wit wyne wat onder ideale keldertoestande verouder is, beklemtoon. ’n Beperkte uitgawe van The Mentors Malbec en Nebbiolo, asook Pinotage-lotte en KWV se XO Pinotage enkeldruifbrandewyn, het ook sterk bieëry uitgelok.
Die Kaapse Wynmeester en seremoniemeester vir die aand, Bennie Howard, het op die Pinotage-lotte gereageer: “Die Pinotage-items was die sterre van die aand – ’n sprekende bewys dat KWV voortgaan om die uitsonderlike gehalte en diversiteit van Suid-Afrikaanse wyn en brandewyn te beklemtoon, iets waarop ons met trots feesvier.”
Erfenis-lotte van versterkte wyne ook in aanvraag
Ander lotte wat belangstelling getrek het, was ’n seldsame en historiese versameling van Kaapse versterkte wyne wat dateer uit die 1940’s tot 1970’s – insluitend oujaar Ports, Muscadel, Wit Port en Hanepoot Jerepigo.
Skink ’n glas vir gemeenskapsontwikkeling
Alle winste van die KWV-veiling 2025 sal geskenk word aan Nation Builder, ’n organisasie wat daarop fokus om nie-winsgewende instellings landswyd te versterk. Die eerste veiling verlede jaar het reeds meer as 100 geregistreerde NPO’s gehelp om hul kapasiteit te verbeter – ’n nalatenskap wat vanjaar se veiling poog om verder uit te bou.
“Ons is ongelooflik dankbaar teenoor KWV en hul span vir hul ruimhartigheid en dat hulle die roeping om ’n werklike, blywende verskil te maak so ernstig opneem,” het Nation Builder se uitvoerende hoof, Ivan Swartz, aan die einde van die aand gesê. “Dit is ’n voorreg om saam te werk met ’n baanbrekermaatskappy van só ’n statuur.”
You must be logged in to post a comment.