Die Taalmonument bied opleiding oor boekherstel en -bindery vir beginners aan met die boekherstel-spesialis George Wentzel by die Afrikaanse Taalmuseum en -monument (ATM).
Wentzel, ’n gekwalifiseerde meesterboekbinder met 46 jaar ondervinding, bied van 3 tot 5 Oktober (09:00 tot 16:00) ’n kursus oor die herstel van ou hardebandboeke aan. Hy het voorheen in die Nasionale Biblioteek se boekbewaringsafdeling gewerk. Geen vooraf opleiding is nodig vir die tweetalige kursus nie. Deelnemers sal drie boeke maak en bladgoudwerk en basiese boekherstelwerk doen. Ingesluit is werksprosedures, ’n oorsig van die dele van ’n boek en die samestelling daarvan, asook demonstrasies van en praktiese oefeninge in skutblaaie, boekbindwerk, leerbindwerk, omhulsel-afronding en bladrugsteun.
Die koste is R2 000 per persoon en sluit in ’n sertifikaat van bywoning en basiese gereedskap. Bespreek by Jeffrey by bemarking2@taalmuseum.co.za of 021 872 3441. Koffie en tee is ingesluit. Deelnemers moet hul eie etes bring of dit by die ATM-koffiehuis koop.
