Negentien jong leerders van oor die land heen is onlangs in die jaarlikse Pick n Pay Hero-toekennings vereer.
Hierdie toekennings erken leerders wat ’n positiewe impak in hul gemeenskappe gemaak het te midde van uitdagings of dié wat die afgelope jaar uitsonderlik uitgereik het om ander te help.
Die wenners het uitsonderlike goedhartigheid, moed en verantwoordelikheid getoon.
Een leerder het sy sakgeld gebruik om kolwyntjies vir kinders met kanker te bak, terwyl ’n ander rondloperdiere gered en wildlewe by sy skool beskerm het. Nog ’n leerder het omgewingsbewustheid bevorder deur skoonmaakveldtogte en herwinning, en twee ander het ongelooflike moed tydens ’n traumatiese skietvoorval getoon. Hierdie jong helde se optrede is ’n inspirasie en moedig ander aan om ook ’n verskil te maak.
Monique King, ’n graad 6-leerder van Ronwe Primêre Skool in die Paarl, is vir haar respekvolle optrede vereer en het met ’n Pick n Pay-koopbewys van R2 000 weggestap. Monique presteer goed by die skool en speel ’n aktiewe rol in die stryd teen boeliegedrag op die skoolterrein. Toe sy eendag sien hoe ’n klasmaat geboelie word, het sy onverskrokke ingespring om die slagoffer te verdedig. Sy glo dat respek vir ander belangrik is en dat niemand geboelie moet word nie.
Die Pick n Pay School Club het die Hero-toekennings 15 jaar gelede begin om ’n kultuur van self- en sosiale bewussyn in skole en gemeenskappe te bevorder. Dit weerspieël ook Pick n Pay se filosofie dat “om goed te doen, goeie besigheid is”.
Onderwysers van die 2 600 deelnemende skole identifiseer leerders wat uitsonderlike dade van moed, goedhartigheid of alledaagse heldhaftigheid gepleeg het, deur die jaar. Hierdie leerders word met sertifikate en kentekens beloon. Die jaarlikse Hero-toekennings is die hoogtepunt van hierdie program, waar onderwysers leerders in sewe afdelings benoem om hul deel van R35 000 in Pick n Pay-koopbewyse te wen.
Meer as 1 000 inskrywings is van laerskole oral in Suid-Afrika ontvang, en die 19 wenners het nie net koopbewyse nie, maar ook groot Hero-sertifikate vir hul positiewe optrede ontvang.
Die Hero-toekennings is ’n kernkomponent van Pick n Pay School Club, die grootste handelsmerk-ondersteunde opvoedkundige program in Suid-Afrika, wat gratis kurrikulum-gebaseerde opvoedkundige hulp aan 3 280 skole landwyd bied.
“Om te sien hoe hierdie leerders persoonlike uitdagings met optimisme en moed oorkom, is ’n inspirasie vir ons almal,” sê Vaughan Pierce, uitvoerende bestuurder vir ESG by Pick n Pay. “Die Hero-toekennings is daarop gemik om dieselfde gees van goedheid en inspirasie in gemeenskappe aan te wakker.”
Die Hero-toekennings erken leerders in die volgende afdelings:
. Moed (dapperheid in moeilike omstandighede). Onselfsugtigheid (om ander eerste te stel). Goedhartigheid/sorgsaamheid (vir mense, diere en die omgewing). Respek (ander met waardigheid behandel). Eerlikheid (die waarheid praat en foute erken). Spanwerk (goed saamwerk in die klaskamer en op die speelgrond). Omgewingsbewustheid (sorg vir die natuur deur skoonmaak en herwinning).
Die Hero-toekennings dien as bewys dat jong leerders ’n groot verskil in hul gemeenskappe kan maak.
