Die Sentrale Energiefonds het amptelik die jongste brandstofprysverhogings aangekondig wat gister (Woensdag 2 November) ingestel is, en dit is: 93- en 95 oktaan-petrol styg met 48 c per liter.
Saterdag (22 Oktober) het ek my 1400- Toyota Corolla, ’n 1996-model-vierganghandrat, se tenk tot by die “eerste kliek” volgemaak en die bande volgens die motor se handleiding laat pomp.
Ek ry toe van buite die Paarl tot by die Rugbymuseum tussen Klapmuts en Stellenbosch en toe tot op Porterville, waar ek by my suster en swaer gekuier het. Daar (in Porterville) het ek weer brandstof ingegooi en uitgewerk my petrolverbruik was 14,8 km/liter oor ’n afstand van 139,7 km.
So, my wenk aan lesers is – hou die voertuig se tenk vol tot by die eerste kliek en pomp die voertuig se bande volgens die handleiding van die voertuigvervaardiger, en doen dit net by een vulstasie, want vulstasies se banddrukmeters verskil soms.
Ry teen een spoed en oorkom só die brandstofprysverhoging, want dan raak dit jou nie so baie nie.
’n Mens moet afleer om net te ry “met ’n gat in die petroltenk” deur dit vol te hou en só beter petrolverbruik per kilometer vir ’n liter te kry.
