Koerantman, jeugboekskrywer, ’n ondernemende entrepreneur in die uitgewersbedryf met ’n fyn waarnemingsvermoë en humorsin, toastmaster. karavaanparkontwikkelaar, Artes-wenner.
Sò kan mens die lewe van Johan Nel (80) opsom, wat tot met sy dood verlede Dinsdag (23 Januarie) korrespondent vir die Paarl Post in Wellington was. Hy was ook ’n gereelde bydraer tot die Post Scriptum-rubriek.
Blaai mens deur ’n plakboek deur sy vrou, Sannie, leer mens dat hy as uitgewer (eers by Makro Boeke en later ook Benedict Uitgewers) gemoeid was by die publikasie van by die 700 boeke, en op sy dag onderburgemeester van Verwoerdburg (deesdae Centurion) was.
As bestuurslid het hy Paarl se Toastmasters en die toerismebeen van die voormalige Sentraal-Transvaal gedien. Hy’t ’n koerant op Betlehem help stig, was in die 1960’s redakteur van die Weermag se Kommando-tydskrif, en het selfs ’n Russiese spioenasieband of twee vir die regering vertaal.
Nel is 8 Desember 1937 gebore. Hy het op Keimoes langs die Oranjerivier grootgeword, waar sy pa ’n laerskoolonderwyser was en ook korrespondent van Die Burger. As 11-jarige het Nel se eerste artikel ook in dié koerant verskyn, en weldra het bydraes tot die Naweekpos, die Volksblad en die Transvaler gevolg. Tot onlangs nog het hy artikels gelewer vir veral Die Burger se BY-bylae, asook Huisgenoot en Rapport.
Ná skool het Nel ’n BA-graad in Bloemfontein behaal. Later het studies in kommunikasiekunde en televisievervaardiging gevolg.
Hy’t vier spoedlees-spanningsverhale vir ’n Bloemfonteinse vriend geskryf. Dié was nie blitsverkopers nie, maar in die proses het hy sy vrou Sannie – met wie hy vroeër vandeesmaand 50 jaar getroud was, ontmoet.
Ná jare in Pretoria het Nel die nuwe millennium ingelui deur na Wellington te trek.Gou het hy as verslaggewer ’n gereelde gesig by al wat gemeenskapsbyeenkoms op die dorp geword.
Nel se skrywes, stories en sommer net sy teenwoordigheid om elke hoek en draai gaan deur inwoners gemis word.
• Sy begrafnisdiens is Dinsdag in NG Kerk Wellington-Noord gehou. Naas sy vrou Sannie en dogters Marietjie en Leonora laat hy ook sy skoonseun Francois Smit en kleinkinders Rudi en Renate agter.
