Die die Bôll & Ôll-rugby-kletsprogram wat reeds op eExtra sowel as eTV verskyn, is verlede Donderdag (23 Mei) by die Welbedacht-wynlandgoed buite Wellington tydens ’n perskonferensie bekendgestel.
Dié kletsprogram se primêre fokus sal wees om rugby op klub-vlak te bevorder deur elke episode ’n ander rugbyklub in die Wes-Kaap, en veral die Boland rugby-unie, te nader en die belangrikheid van gemeenskapsrugby vir hierdie sport uit te lig.
Die aanbieders van die program sluit in JP Keyter, (sportaanbieder en voormalige rugbyspeler op klub- en universtiteitsvlak), Ashwin Willemse (sportaanbieder en voormalige Springbok-rugbyspeler), en prof. Wilbur Kraak (professor in sportafrigting en prestasie-analise by die Universiteit van die Wes-Kaap).
Dit is Willemse se eerste keer op die kassie sedertdien sy hoogs gekritiseerde SuperSport-uitsending waar hy in 2018 van die televisiestel af weggestap het nadat hy Nick Mallett en Naas Botha van rassisme beskuldig het.
Volgens Schalk Burger sr., die eienaar van die Welbedacht-wynlandgoed waar die kletsprogram geskiet is, is die kern van Bôll & Ôll om die belangrikheid van rugby op voetsoolvlak te bevorder.
Die eerste episode het die stigterslede van die Bella Vista-rugbyklub in die Ceres-omgewing verwelkom, waar hulle nostalgies gepraat het oor die ontstaan van dié klub.
Dié klub se stigterslede het verduidelik hoe talentvolle spelers op hand me downs moes staatmaak om hul rugbyloopbaan af te skop en hoe hulle ten spyte van harde klippe kou ’n sukses van hul loopbaan gemaak het.
Sulke voel-goed-stories sal reg deur die program uitgelig word sodat kykers die verenigende gevoel wat gemeenskapsrugby bied, kan beleef.
“Deur die basis van rugby [wat klubrugby is] te bevorder, sal die kommersiële basis ook groei,” het Burger gesê; dit wil sê vir spelers om ’n kans op provinsiale, of nasionale vlak te kry.
“Ons [Bôll & Ôll] wil kykers behou deur authentic te wees,” het Keyter gesê.
Bôll & Ôll is reeds van 26 Mei af op die kassie te sien en word elke Sondag om 18:30 op eExtra uitgesaai, met ’n heruitsending op eTV elke Saterdag daarna om 18:30.
Vir nou kan rugbyliefhebbers uitsien na drie seisoene van 13 episodes elk, met nog seisoene in die pyplyn, sê Burger.
