Die Boland-rugbyunie het onlangs sy bekeruitdeling by die Kronenberg-landgoed gehou.
Die bekende Supersport-krieketaanbieder en spanbestuurder van die Paarl Rocks-krieketspan, Jeremy Fredericks, was die seremoniemeester en die gasspreker was dr. Helena von Schlicht, burgemeester van die Kaapse Wynland-distriksmunisipaliteit.
Tapiwa Tsomondo, flank van die Boland-Kavaliers, is die speler van die jaar terwyl Marlyn Williams (slot) en Valentino Wellman (vleuel) onderskeidelik die voorspeler en agterspeler van die jaar is. Taine-Randall Booysen, wat vanjaar nog die Boland se o.20-span gelei het, het die deurbraakspeler van die jaar-prys gekry.
Volgens Randall Modiba, hoofafrigter van die Kavaliers, was Tsomondo vanjaar op sy beste. “Tapps het vanjaar konstant goeie vertonings gelewer en Marlyn het Clemen Lewis, Ludio Williams en Zandré Jordaan uitgestof vir die prys voorlangs. Valentino was in ’n tweestryd gewikkel met Elgar Watts vir agterspeler van die jaar en het ook deurgaans goed vir ons gespeel.
Iemand soos Taine-Randall moes ons noodgedwonge gebruik ná ’n rits beserings ons getref het, maar hy het gewys dat hy op die senior vlak kan speel,” het Modiba gesê.
Onder die vroue het Elmary Fienies die voorspeler van die jaar asook die spelers se speler van die jaar gewen terwyl Onako Jita die speler van die jaar is.
Die Boland-Kavaliers is reeds besig met sy voorseisoen se voorbereiding.
