Bejaardes kan uitsien na ’n dag spesiaal vir hulle.
Die Kuns- en kultuurdag vir Bejaardes vind Woensdag 18 Oktober in Wellington-stadsaal plaas.
Die organisasie Age-in-Action vir bejaardes in die Drakenstein- en Wynlanddistrik reël die dag.
Die Kuns- en kultuurdag vorm deel van die Week vir Ouer Persone en bied aan die ouer mense ’n wonderlike geleentheid om hul talente deur middel van kuns, toneelspel en musiek ten toon te stel.
Daar word veral gefokus op bejaardes wat uitsluitlik afhanklik is van hul Sassa-ouderdomspensioen van R1 600 per maand.
Verlede jaar se Kuns- en kultuurdag het by Pniël naby Stellenbosch plaasgevind.
Nagenoeg 500 bejaardes afkomstig van dienssentrums, klubs en tehuise van omliggende dorpe in die streek het die byeenkoms bygewoon.
Vir vanjaar se byeenkoms in Wellington word heelwat meer bejaardes uit die omliggende gemeenskappe verwag.
Die dag word gratis in samewerking met die plaaslike munisipaliteit aangebied.
Die organiseerders benodig nog verversings sodat ’n ligte ete vir die bejaardes aangebied kan word.
Inwoners of besighede wat ’n finansiële bydrae of ’n skenking wil maak, kan vir Marcel van Dyk, maatskaplike werker van Age-in-Action, by 021 423 0204 bel.
