Die tafel is gedek vir ‘n aksiebelaaide eindstryd in die Boland-T10 wanneer die nuweling Paarl Rapids teen die verdedigende kampioen, Stellenbosch Kings, vanaand (Maandag 27 Oktober) op Bolandpark te staan kom.
Die opwindende Boland-T10-krieket-halfeindwedstryde, wat oor slegs 10 boulbeurte per span strek, is Sondag (26 Oktober) op Bolandpark in die Paarl beslis.
Die formaat bevorder opwindende spel, kragtige kolfwerk en strategiese boulwerk.
Die kompetisie het uit sewe streekspanne bestaan – Northern Raiders, Overberg Indwe, Paarl Rapids, Paarl Rocks, Stellenbosch Kings, Wellington Wolves en West CoastBlues.
Die Boland-T10-kompetisie bevorder nie net plaaslike kriekettalent nie, maar gee jong spelers ’n platform om hul vaardighede te wys.
Die toernooi trek duisende plaaslike ondersteuners en groot media-aandag en verseker dat die aksiebelaaide toernooi tot sportontwikkeling in die Boland-krieketstreek bydra.
Die Stellenbosch Kings, Paarl Rapids, Paarl Rocks en Raiders het ná die opwindende uitspeelwedstryde na die halfeindronde op Sondag 26 Oktober op Bolandpark deurgedring.
Al vier wedstryde het gewis aan die verwagtinge voldoen en vorige wedstrydstandaarde oortref, wat aandui dat Boland Krieket ‘n wenresep vir klubkrieket het.
In die eerste halfeindstryd het Overberg Indwe teen die Stellenbosch Kings te staan gekom en 83/4 in hul toegelate 10 boulbeurte behaal. Die Kings het die teiken afgeslaan deur 85/3 in die negende boulbeurt aan te teken en die eerste finalis geword nadat hulle met sewe paaltjies geseëvier het.
LEES OOK: World-class cricket action awaits holidaymakers in December, January
In die tweede halfeindronde het die Paarl Rapids kragte gemeet teen die Paarl Rocks en in sy toegelate 10 boulbeurte 91/6 behaal. Paarl Rocks het baie hard probeer om die teiken te haal, maar is deur Rapids tot 90/6 beperk. Hulle is ongelukkig met een lopie geklop, met Rapids wat na die eindwedstryd teen Stellenbosch Kings deurgedring het.
- Die derde- en vierde-plek-uitspeelwedstryd word om 17:30 tussen Overberg Indwe en Paarl Rocks beslis, terwyl die verdedigende kampioene, Stellenbosch Kings, om 20:00 teen die nuwe span op die horison, die Paarl Rapids, in die 2025 Boland T10-eindstryd te staan kom.
